සිව් රඟ(DICF 2011 Theme Song)

අද 20 වෙනිදා.
මං පහුගිය දවස් වල හැමෝම එක්ක කිය කියා හිටියෙ 20 වෙනිදට කලින් සුබ ආරංචියක් අරන් එනවා කියල.
මේ ලෑස්ති වෙන්නෙ ඒ පොරොන්දු වුන විදියට සුබ ආරංචිය ඔයාල එක්ක බෙදා ගන්න.
පහුගිය දවස් වල මං පොඩි වැඩකට අත ගහල තිබුනේ. අපේ ස්කොලේ පළමු වරට පවත්වන අන්තර්ජාතික චෙස්  තරඟාවලිය වෙනුවෙන් theme song එකක් හදන්න කියල මට ආරාධනාවක් ලැබුන මීට මාසෙකට විතර උඩදි.

ඒ දවස් වල මං විභාගේ ලිය ලිය හිටියෙ. ඒ වුනත් ඒ ආරාධනාව මං ගොඩාක් සතුටින් බාර ගත්ත. ස්කොලෙන් out වෙලා අවරුදු ගානක් ගත වුනත් තාමත් පරණ උණ ඇඟේ තියෙන නිසා වෙන්න ඇති මං හිතන්නෙ. 
සින්දුවට පද මාලාව නිර්මාණය කරලා දුන්නේ අපේ ලහිරු යසස් මල්ලි. චෙස් ක්‍රීඩාවේත් මිතු දමේ අගයත් නිරූපණය වෙන විදියේ ලස්සන පද මාලාවක් මට ලැබුණ.

සිව්රඟ සෙනග උරෙනුර ගැටෙන

සූ සැට ඉමැති හටනකි පෙතේ....
ඒ බිම හැපෙන අප හිත් මතිනි
සෝයුරු සෙනේ දම් හැඩ උනේ....
              දුලලමු සෙනේ...

නසා උනුනම නගා ජයදද
කුමන පල මා සුමිතුරේ...
රජුන්මය රැජිනියන් අප හැම
දනව් මායිම් නැති බිමේ..
               සෙනෙහස් ඉමේ...

පෑ නිසා දෙපසට නොවී
එකට අත් බැඳ නැගෙමිනේ...
නේක පෑ දුල් අහස කොයිබද
සොයා ඉගිලෙමු මිතුරනේ..
               එක රෑනිනේ....

මේ සින්දුව produce කරේ Audio Lab එකේ Kaushik Milinda 

වැඩි කතා ඕනෙ නැති වෙයි මං හිතන්නෙ. වැඩිය කියව කියව හිටියොත් තවත් පරක්කු වෙනවා වැඩේ.
සින්දුව මෙතනින් අහල බලන්න.

මේ වෙලාවේ ස්තුති කරන්න ඕන ගොඩාක් අය ඉන්නවා.
මට මේ සින්දුව හදන්න අවස්ථාව ලබා දුන්න ඩෙනිස් මල්ලි ඇතුළු ධම්සෝ ආදී චෙස් ක්‍රීඩකයන්ගේ සංගමයේ සියලු දෙනාටම!

Audio Lab වල නිසල් ගංගොඩගේ ඇතුළු සියලුම දෙනාට!

producer කෙනෙක් හොය හොයා ඉද්දි කෞශික් මිලින්දට මාව හඳුන්වල දීලා ගොඩාක් උදව් කරපු අපේ නලින් කාරියවසම් මල්ලිට!
මේ සින්දුව වෙනුවෙන් ෆොටෝ එක හදල දීපු ශයංග මල්ලිට!

නම් වශයෙන් මතක් කරන්න බැරි වුන එක වචනෙකින් හරි මට සහය දීපු සියලුම දෙනාට!

සින්දුව අහල ලස්සනයි කියල හිතෙනවා නම් පොඩි සහයෝගයක් දෙන්න.
ඔයාලගේ ප්‍රතිචාර තමයි තව තවත් දේවල් කරන්න අපට ලැබෙන ලොකුම දිරිය!